Հեքիաթը փոխադրում եք գրական հայերեն (արևելահայերեն): Անպետք մարդը
Մի աղքատ մարդ կնոջը ասաց․
– Կնիկ, մի հատ գարու հաց թխի, ճանապարհ եմ գնալու։
Գնաց, ճանապարհի կեսին տեսավ ՝ արջ է կանգնած։ Արջն ասաց․
– Մարդ, ո՞ւր ես գնում։
Մարդն ասաց․
– Գնում եմ Աստծու մոտ բողոքելու։
Արջն ասաց․
– Աստծուն ասա իմ մեջքը ցավում է, ինչպե՞ս անեմ, որ լավանա։
Մարդը գնաց, հանդիպեց մի արտ։ Արտ հնձողները ասացին․
– Մարդ, ո՞ւր ես գնում։
Մարդն ասաց․
– Գնում եմ Աստծու մոտ բողոքելու։
– Կգնաս կասես Աստծուն, որ այս արտը, որ ժամանակը գալիս է, ինչո՞ւ ցորեն չի տալիս։
Մարդը թողեց գնաց, հանդիպեց մի ձկան։ Ձուկն ասաց․
– Մարդ, ո՞ւր ես գնում։
– Գնում եմ Աստծու մոտ բողոքելու։
Ձուկն ասաց․
– Աստծուն կասես, ինչո՞ւ է իմ գլուխը ցավում։
Մարդը թողեց գնաց։ Քիչ էր մնացել հասնի Աստծու մոտ, հրեշտակները առաջը կտրում են, ասում են․
– Մարդ, ո՞ւր ես գնում։
– Գնում եմ Աստծու մոտ բողոքելու։ Գնացեք Աստծուն ասեք, որ այն աղքատ մարդը ապրուստ է ուզում։
Հրեշտակները գնում են, Աստծուն ասում են․
– Այս մարդն ապրուստ է ուզում։
Աստվածն ասում է․
– Խնդրողներիս հարցերի պատասխան քեզ կասեմ, կգնաս կասես, մի կճուճ ոսկի կստանաս։
Այս մարդը նեղացավ Աստծուց, ասաց․
– Ես մի կարաս ոսկու համար չեմ եկել, ես միլիոն-միլիոն ոսկու աղքատ եմ, ես մի կճուճ ոսկու աղքատ չեմ։
Մարդը թողեց, հետ եկավ։ Ճանապարհին տեսավ, որ արտը չորացել է։
Հնձվորները եկան իր դիմաց, ասացին․
– Մարդ, Աստվածն ի՞նչ ասաց։
– Աստվածն ասաց, որ այնտեղ մի հատ քար կա, քարը շրջեք, արտը կկանաչի։
Հնձվորները քարը շրջեցին, տեսան, որ ոսկի է թափվում, ասացին․
– Մարդ, արի մի կճուճ ոսկի տար քեզ։
– Հա՜յ-հա՜յ, ես մի կճուճ ոսկու աղքատ չեմ, ես միլիոն-միլիոն ոսկու աղքատ եմ, – ասաց մարդն ու թողեց գնաց։ Հանդիպեց ձկանը, ասաց․
– Աստված ասաց, որ ձկան գլխի մեջ ոսկե խաչ կա, հանիր, ձուկը կլավանա։
Ձուկը խաչը հանեց, ասաց․
– Մարդ, վերցրու այս ոսկե խաչը, տար քեզ։
– Հա՜յ-հա՜յ, ես խաչի աղքատ չեմ, ես միլիոն-միլիոնի աղքատ եմ, – ասաց մարդն ու շարունակեց իր ճանապարհը։ Եկավ հանդիպեց արջին։ Արջը տեսավ, որ մարդը եկավ, ուրախացավ, ասաց․
– Վայ, մարդ ջան, եկա՞ր, Աստվածն ի՞նչ ասաց։
Մարդն արջին պատմեց իր գլխին եկած բաները և ասաց․
– Աստվածն ասաց, որ մի հատ անպետք մարդ կհանդիպի, մեջքը կոտրի, ու այն կլավանա։
Արջն ասաց․
– Է, քեզանից էլ անպետք մա՞րդ, արի քեզ ուտեմ։
Արջն այդ մարդու մեջքը կոտրում է, և ուտում։